یاد تیری نہ ہو اگر زندگی زندگی نہیں

اس کے بغیر میں جیوں ایسا بھی ہو کبھی نہیں

 

بندۂ حسن ہوں مجھے عشق ہے اپنی ذات سے

اور اسی لیے کہیں میری نظر جمی نہیں

 

تیرے جمال کی قسم تیرے جلال کی قسم

سچ ہے کمال حسن کا تیرے جواب ہی نہیں

 

ہو نہ سکا وہ کامراں مل نہ سکی اسے بقا

زندگی جس کی جانِ جاں تیرے لیے مٹی نہیں

 

بات ہی بات میں کبھی چھیڑی جو بات وصل کی

باتیں بنائیں لاکھ پر بات کبھی بنی نہیں

 

اس کی جفائے ناز میں کوئی کمی کبھی نہ ہو

میری وفائے عشق میں کوئی کمی کبھی نہیں

 

درد کی داستاں معین ان کو سناؤں تو مگر

سن کے وہ دیکھتے ہیں یوں جیسے ابھی سنی نہیں

Read More

 

میں خوشی کوجانتا کیا جو وہ غم زدہ نہ کرتے

مجھے دردِ دل نہ دیتے ، میرا کچھ سوا نہ کرتے

 

میرا آشیاں جلایا مجھے لامکاں بنایا

یہ بقا کہاں سے ملتی وہ اگر فنا نہ کرتے

 

مجھے سرِ لاالہ کی کبھی آگہی نہ ہوتی

جو غمِ جہاں سے بڑھ کر کوئی غم عطا نہ کرتے

 

مری شمع ِزندگی تو مجھے ساتھ ہی جلاتی

کہ یہ حشر تک نہ بجھتی تم اگر جدا نہ کرتے

 

سرِ بزم گر بلا کر ہمیں تم نہ کرتے رسوا

تیرا ہر ستم اٹھاتے پر کبھی گلہ نہ کرتے

 

کبھی اے شہیدِ ایماں! یہ جہاں نہ زندہ ہوتا

سرِ نیزہ بندگی کا جو حق آپ ادا نہ کرتے

 

مرا جذبہ محبت نہ معین جگمگاتا

وہ اگر ستم نہ کرتے وہ اگر جفا نہ کرتے

Read More

 

نظر ملا کرکسی نے یارو نظر کا جادو چلا دیا ہے

نہ جانے کیسی دیکھائی آنکھیں کہ پل میں اپنا بنا لیا ہے

 

نہ دن کو راحت نہ چین شب کو یہ کیسی الجھن میں آ پھنسا ہوں

خدا ہی جانے کسی نے مجھ پر یہ کیسا جادو کیا ہوا ہےے

 

غمِ جدائی میں مر رہا ہوں، ہزار حیلے بنا رہا ہوں

کسی طرح جا ملوں میں  اس سے جو مجھ کو چھوڑے چلا گیا ہے

 

نظر سے مل کر نظر نے آخر عجیب شہرت جنوں میں پائی

کہ جس نے دیکھا کہا اسی نے نظر کا مارا یہ پھر رہا ہے

 

نہ پوچھ مجھ سے کہ کیسی گزری گزار دی  جس طرح بھی گزری

کسی پہ کوئی گلہ نہیں ہے یہ اپنی تقدیر کا لکھا ہے

 

نہیں محبت رہی جو مجھ سے تو اس میں کچھ زور ہی نہیں ہے

کسی نے نظریں جو پھیر لی ہیں بتاؤ اس کا علاج کیا ہے

 

نظر نے جس دم نظر کو دیکھا تو پھر نظر ہی نظر میں اے دل

نظر نے باتیں نظر سے کر کے نظر سے سب کچھ نذر کیا ہے

 

وہ چپکے چپکے سے مسکرانا وہ چپکے چپکے سے بات کرنا

اندھیری راتوں میں آنا جانا  گلے وہ ملنا کہا ں گیا ہے

 

کسی کی فرقت میں رات دن اب بڑے مزے سے گزر رہے تھے

لگن سی دل میں لگی ہوئی ہے مزہ محبت کا آ رہا ہے

 

کہا جو میں نے کہ بعد مردن  میرے جنازے پہ ہاتھ رکھنا

تو ہنستے ہنستے کہا یہ اس نے جہاں میں ایسا کبھی ہوا ہے

 

یہ بات آپس میں طے ہوئی ہے کہ مجھ میں تجھ میں دوئی  نہیں ہے

ہے ایک ہی ذات کا یہ جلوہ نظر جو دونوں میں آ رہا ہے

 

نہیں ہےمشتاق اب مزہ کچھ یہ دل لگی ایک کھیل سی ہے

کبھی محبت کبھی ہے نفرت یہ اک تماشا بنا ہوا ہے

Read More

 

تو نے بت ہر جائی ، کچھ ایسی ادا پائی

تکتا ہے تیری صورت ہر ایک تماشائی

 

اب دل ہے یہ چکر میں سب ہوش و خرد گم ہیں

کوچے میں محبت کے چلتی نہیں دانائی

 

تُو عِشق میرا ہر گِز غیروں سے نہ کر ظاہر

 اِس میں میرا چرچا ہے اور ہے تیری رُسوائی

 

پہلے سے نہ سوچا تھا انجام محبت کا

تب ہوش میں آئے ہیں جب جان پہ بن آئی

 

جی بھر گیا دنیا سے اب دل میں یہ حسرت ہے

تو ہوتیرا جلوہ ہو  اور گوشئہ تنہائی

 

طعنوں سے ہے دل زخمی، زخموں سے جگر خوں ہے

لو دل کے لگانے کی ہم نے یہ سزائی پائی

 

یوں باندھ کےبیٹھا ہے دامن تیرے دامن سے

دیوانے پہ قُربان ہے داناؤں کی دانائی

 

مدت سے امیر ان سے ملنے کی تمنا تھی

آج اس نے بلایا ہے، لینے کو قضا آئی

 

Read More

 

جدا  وہ ہو گئے ،لگتا نہیں ہے

ہیں پردے میں مگر پردہ نہیں ہے

 

بسی ہے آنکھ میں صورت تمہاری

کوئی چہرہ ہمیں جچتا نہیں ہے

 

جدائی آپ کی تڑپا رہی ہے

ہمارا دل کہیں لگتا نہیں ہے

 

ذرا سی دیر کو آ جائیے گا

بہت دن سے تمہیں دیکھا نہیں ہے

 

بظاہر تو نظر آتے نہیں ہو

نہیں ہو ساتھ تم ، ایسا نہیں ہے

 

Read More